ԱՄՆ-ի քայլերը հարվածել են Իրանի ապրանքաշրջանառությանը. Փեզեշքիան

Իրանի նախագահ Մասուդ Փեզեշքիանը հայտնել է, որ ԱՄՆ-ի քայլերի պատճառով երկրի ապրանքաշրջանառությունը կրճատվել է 25-35%-ով։

Իսլամական հանրապետության ղեկավարի խոսքով՝ արտահանման ծավալները նվազել են, իսկ ներմուծումն արձանագրել է էլ ավելի մեծ կրճատում։ Փեզեշքիանը նաև ընդգծել է, որ պատժամիջոցների՝ Իրանի տնտեսական վիճակի վրա ազդեցություն չունենալու վերաբերյալ պնդումները հակասում են իր ներկայացրած փաստերին։

Հիշեցնենք` Թեհրանն ու Վաշինգտոնը հունիսի 18-ի գիշերը հուշագիր ստորագրեցին, որը փետրվարի 28-ին սկսված հակամարտության ավարտ էր ենթադրում, սակայն ԱՄՆ զինվորականները հուլիսի 8-ի լույս 9-ի գիշերը հզոր հարվածների շարք սկսեցին Իրանի ուղղությամբ։ ԱՄՆ ԶՈւ կենտրոնական հրամանատարությունը հայտարարեց, թե դա իբր արվել է ի պատասխան Հորմուզի նեղուցով անցնող առևտրային նավերի դեմ Իրանի գործողությունների։

Հուլիսի 8-ին Անկարայում ՆԱՏՕ-ի գագաթնաժողովի ժամանակ ԱՄՆ նախագահ Դոնալդ Թրամփը հայտարարեց, որ Իրանի հետ հրադադարն ավարտվել է: Հուլիսի 12-ի գիշերը ամերիկյան ուժերը հարձակվեցին Իրանում, Պարսից ծոցի ափերի երկայնքով և Հորմուզի նեղուցում գտնվող շուրջ 140 թիրախների վրա։

Իրանի Մեջլիսի խոսնակ Բաղեր Ղալիբաֆն իր հերթին հայտարարեց, որ միակողմանի գործարքների դարաշրջանն ավարտվել է, և զգուշացրեց` եթե ԱՄՆ–ն չպահպանի հրադադարի համաձայնագրի պայմանները, պատասխանը չի ուշանա։