Աղետի գոտում համաճարակի ռիսկ կա տիղմի և սատկած կենդանիների պատճառով. նախարար

Հանձնաժողովներ կան ստեղծված հանրապետական, մարզային եւ համայնքային, որոնք աշխատում են, գնահատում են վնասները տարբեր ուղղություններով: Այս մասին այսօր ԱԺ-ում լրագրողների հետ զրույցում նշեց ՏԿԵ նախարար Գնել Սանոսյանը՝ անդրադառնալով Տավուշի եւ Լոռու մարզերում հեղեղումների հետեւանքների վերացման աշխատանքներին:

«Գիտեք, որ բավական բազմաշերտ է վնասը՝ սկսած պետական խոշոր ենթակառուցվածքներից, ինչպիսին միջպետական, տեղական ճանապարհներն են, երկաթգիծն է, այնպես էլ համայնքային, նաեւ անհատական բիզնեսներ, այգիներ, հողեր, տներ եւ այլն: Բայց դեռ վնասների չափը ընդհանրացնել հնարավոր չէ: Հիմա ունենք բարձրահարկ շենքեր, որոնք առաջին հարկերը ջրով եւ տիղմով էին լցվել: Դեռ բավական ժամանակ կպահանջվի՝ հասկանալու համար, թե շենքն ինչ աստիճանի է վնասվել, վնասվել է, թե ոչ, վթարայնության ինչ աստիճան ունի, այլեւս ապրելու ենթակա է, թե ոչ: Ցավոք, վնասի բավական մեծ թվեր կլինեն՝ հաշվի առնելով ընդգրկվածությունը տարածական եւ ոլորտային»,-ասաց նա:

Նախարարի խոսքով՝ ամենից շատ տուժել է Ալավերդի քաղաքը՝ իր թաղամասերով եւ Քարկոպ գյուղը: Ամբողջ գյուղը լցվել էր տիղմով, որտղ հիմա ակտիվ աշխատանքներ կան:

Խոսելով աղետի գոտում համաճարակի բռնկման հավանականությունից՝ Սանոսյանն ասաց. «Մտահոգությունն այն է, որ բավական մեծ քանակությամբ տիղմ կա, որի մեջ կարող են վնասակար նյութեր լինել: Մյուս կողմից կան անկած կենդանիներ՝ հավեր, խոզեր, որոնց մի մասի մարմինները հայտնաբերվել են, մի մասինը՝ ոչ: Դրա համար առողջւապահության լորտի մեր գործընկերները մի կողմից որոնողական աշխատանքներ են իրականացնում, մյուս կողմից հորդորում են զգույշ լինել: Անասունների համար գերեզմանոցներ են առանձնացվել, որ չտարածվեն հիվանդությունները»: