Գեղարքունիքի մարզում քաղաքացին մնացել է հողաշերտի և փլատակների տակ
Այսօր՝ մայիսի 31-ին, արտակարգ դեպք է տեղի ունեցել Գեղարքունիքի մարզում։ Ժամը 16։25-ի սահմաններում ՀՀ Ներքին գործերի նախարարության փրկարար ծառայության 9-11 ճգնաժամային կառավարման ազգային կենտրոն ահազանգ է ստացվել, որ Ծովասար գյուղի տներից մեկին կից անասնագոմում տեղի է ունեցել փլուզում, որի տակ քաղաքացի է մնացել և նրան դուրս բերելու համար անհրաժեշտ է փրկարարների օգնությունը։
Shamshyan.com-ի հաղորդմամբ՝ պարզվել է, որ ամբողջությամբ փլուզվել է նույն գյուղի բնակիչ 68-ամյա Աղվան Թ․-ին պատկանող անասնագոմի հողաշեն տանիքը, ինչից Աղվան Թ․-ն կիսով չափ մնացել է հողաշերտի և փլատակների տակ։ Փրկարարները՝ օղակի հրամանատար Խաչատրյանի գլխավորությամբ, պարեկները՝ Ն․ Գրիգորյանի գլխավորությամբ և գյուղացիները փլատակների տակից դուրս են բերել վիրավորին ով տեղափոխվել է Մարտունու բժշկական կենտրոն։ Բժիշկները նրա առողջական վիճակը գնահատել են միջին ծանրության։
Դեպքի փաստով ոստիկանության Մարտունու բաժնում փաստաթղթեր են ձևակերպվել, որոնք հնարավոր է փոխանցվի ՀՀ Քննչական կոմիտեի Գեղարքունիքի մարզային քննչական վարչության Մարտունու քննչական բաժին։
Աղբյուրը հայտնում է նաև, որ մինչ փրկարարների ու պարեկների ժամանումը վիրավորին փլատակների տակից փորձում էին դուրս բերել գյուղացիները։
