Մարդու իրավունքների պաշտպանն առայժմ զերծ է մնում Կիրանց մեկնել՝ կիրանցեցիների հետ հանդիպման․ «Փաստինֆո»
Մարդու իրավունքների պաշտպան Անահիտ Մանասյանն առայժմ զերծ է մնում Կիրանց մեկնել՝ կիրանցեցիների հետ հանդիպման։ Այս մասին գրում «Փաստինֆո»-ն՝ Telegram-ում։
Նշենք, որ Կիրանցում լարված իրավիճակ է։ Իշխանականները կիրանցեցիներին «փոխհատուցում» են առաջարկում՝ նրանց տունն Ադրբեջանին փոխանցելու դիմաց, ինչից կիրանցեցիները հրաժարվում են։ Նրանք այժմ փակել են միջպետական ճանապարհը։ Կանանցից մեկը հայտնել է, որ պահանջում են հանդիպում՝ ՄԻՊ-ի և մարզպետի հետ։
Լրատվամիջոցը կապ է հաստատել ՄԻՊ աշխատակազմի հետ՝ պարզելու, թե արդյո՞ք ՄԻՊ-ը պատրաստվում է այցելել Կիրանց և հանդիպել բնակիչների հետ։
«Ի պատասխան Տավուշի մարզի Կիրանց գյուղի բնակիչների հետ առաջիկայում Մարդու իրավունքների պաշտպանի հնարավոր հանդիպման վերաբերյալ Ձեր հարցին` տեղեկացնում ենք, որ հարցին առնչվող հրապարակային տեղեկատվության առկայության դեպքում ՄԻՊ աշխատակազմը հանդես կգա համապատասպան հրապարակումով»,- նշել են գրասենյակից:
