Բերքաբերի սահմանին ականզերծում արած սակրավորի ոտնաթաթը պոկվել է, նա տեղափոխվել է Երևան. Ոսկան Սարգսյան
Բերքաբերի սահմանին ականզերծում արած սակրավորի ոտնաթաթը պոկվել է, նա տեղափոխվել է Երևան։ Այս մասին ֆեյսբուքյան իր էջում հայտնել է լրագրող Ոսկան Սարգսյանը։
«Իջևանի բժշկական կենտրոնից տեղեկացա, որ Բերքաբերի սահմանագոտում ականի պայթյունից սակրավորի աջ ոտնաթաթը պոկվել է։ Նրան, հետագա բուժման համար, Իջևանի ԲԿ-ից տեղափոխել են Երևան»,- հայտնել է Սարգսյանը։
Ավելի վաղ «Տավուշը հանուն հայրենիքի» շարժումը տեղեկացրել էր, որ Կիրանց-Բերքաբեր հատվածում ականապայթյունային վնասվածք է ստացել պայմանագրային զինծառայող Գ.Մարդանյանը (ծնվ. 1980թ.)։
ԱԺ «Հայաստան» խմբակցության պատգամավոր Գառնիկ Դանիելյանը Կիրանցում հայտարարել էր, որ իր տեղեկություններով՝ Տավուշում ականազերծման ընթացքում տեղի է ունեցել ականի պայթյուն, ինչի հետեւանքով զինծառայող է վիրավորվել։
Գառնիկ Դանիելյանի հայտարարության առնչությամբ պարզաբանում էինք խնդրել Պաշտպանության նախարարությունից, որտեղից ի պատասխան NEWS.am-ի հարցմանը փոխանցել էին․ «Ականապայթյունային վնասվածք ստացած զինծառայող կա, որի կյանքին վտանգ չի սպառնում, վիճակը գնահատվում է բավարար»։
