Հայաստանի հինգ խոշոր ջրամբարները 2023-ի համեմատ կրկնակի ավելի շատ ջուր կհավաքեն. ՊՈԱԿ

Հինգ խոշոր ջրամբարներում 240-260 մլն խմ-ով ավելի ջուր կհավաքվի, քան նախորդ տարի։ Այս մասին ապրիլի 5-ին լրագրողների հետ հանդիպման ժամանակ ասաց «Հիդրոօդերեւութաբանության և մոնիտորինգի կենտրոն» ՊՈԱԿ-ի տնօրեն Լևոն Ազիզյանը։

Նրա խոսքով՝ դա երկու անգամ ավելի է, քան 2023թ.-ին։

Նա ասաց, որ Ախուրյանի ջրամբարի լեցունությունը կանխատեսվում է 80-85%, Արփիինը` 85-90%, Ապարանինը` 50-55%, Ազատին և Մարմարիկինը՝ 95-100%:

Ազիզյանի խոսքով՝ կանխատեսվում է, որ ապրիլից հունիս ընկած ժամանակահատվածում Սևանում ջրի մակարդակը կբարձրանա 33-38 սմ-ով։

«Սա կլինի ամենաբարձր ցուցանիշը վերջին երեք տարիների ընթացքում։ Մինչեւ տարեվերջ լճում ջրի մակարդակը կանխատեսվում է 1900,14-1900,2 մետր»,- հավելեց Ազիզյանը։

Նա ընդգծեց, որ ստեղծված են բոլոր պայմանները, որպեսզի Սեւանից լրացուցիչ ջրառ չկատարվի՝ հավելելով, որ ամեն ինչ կախված է եղանակային պայմաններից։