ՀՀ կառավարությունը խզում է կապերը ՌԴ-ի հետ․ հետո դնելու են Գյումրիում ռազմաբազայի գոյության հարցը․ Զատուլին
Հայաստանի կառավարությունը ցուցադրաբար խզում է կապերը Ռուսաստանի հետ: Այս մասին ՌԻԱ Նովոստիին հայտնել Է Պետդումայի ԱՊՀ հարցերով կոմիտեի նախագահի առաջին տեղակալ Կոնստանտին Զատուլինը:
Ավելի վաղ Հայաստանի Անվտանգության խորհրդի քարտուղար Արմեն Գրիգորյանը հայտարարել էր, որ Երեւանը Մոսկվային տեղեկացրել է «Զվարթնոց» միջազգային օդանավակայանում սեփական ուժերով, առանց ռուս սահմանապահների սահմանային հսկողություն իրականացնելու մտադրության մասին:
«Հայաստանի կառավարությունը ցուցադրաբար խզում է կապերը Ռուսաստանի հետ, առիթներ է փնտրում, մի քայլին հաջորդում է մյուսը, դա համապատասխանում է նրանց քաղաքականությանը։ Կարծում եմ՝ «Զվարթնոցով» գործը չի սահմանափակվի։ Ինչ էլ որ նրանք հիմա ասեն, նրանք աստիճանաբար իրականացնում են այն, ինչի մասին մենք զգուշացնում էինք՝ դա ՀԱՊԿ-ից դուրս գալն է, հետո դնելու են Գյումրիում ռազմաբազայի գոյության հարցը», - ասել է Զատուլինը։
