Միրզոյանը՝ «Զվարթնոց»-ից ռուս սահմանապահների դուրսբերման մասին

ՀՀ–ն ի զորու է «Զվարթնոց» օդանավակայանում միայնակ իրականացնել սահմանապահ ծառայություն։ Այս մասին հայտարարեց ՀՀ արտաքին գործերի նախարար Արարատ Միրզոյանը Կիպրոսի Հանրապետության արտաքին գործերի նախարար Կոնստանտինոս Կոմբոսի հետ համատեղ ասուլիսում։

«Ռուսական կողմը տեղեկացվել է հայկական կողմի նախաձեռնության մասին, և մենք շնորհակալություն ենք հայտնել աջակցության համար»,–ասաց նա։

Միրզոյանը հավելեց, որ ծանուցումն արվել է համապատասխան ծառայությունների միջոցով։

Նրա խոսքով` ի սկզբանե ՌԴ սահմանապահների ներկայությունը բազմաթիվ վայրերում, այդ թվում «Զվարթնոց» օդանավակայանում, նախատեսված է եղել որպես օգնություն նորանկախ ՀՀ–ին և նախատեսված էր իրականացնել այնքան ժամանակ, որքան Հայաստանը դրա կարիքը կունենա։

Ըստ Միզոյանի՝ հայկական կողմի ծանուցումը ռուսական կողմին բավարար կլինի, և հարցն այդքանով կլուծվի։ Նա նշեց, որ հայտարարությունը եղել է միայն «Զվարթնոց» օդանավակայանի մասով։