ՌԴ-ին պաշտոնապես տեղեկացրել ենք․ Գրիգորյանը՝ «Զվարթնոց»-ում միայն հայ սահմանապահներ մնալու մասին

Երևանը Մոսկվային պաշտոնապես տեղեկացրել է, որ «Զվարթնոց»-ում պիտի միայն ՀՀ սահմանապահներ լինեն: Այս մասին ԱԺ-ում լրագրողների հետ զրույցում հայտարարել է Անվտանգության խորհրդի քարտուղար Արմեն Գրիգորյանը:

«Հայաստանի դիրքորոշումը այն է, որ Հայաստանի սահմանապահ զորքերը պետք է ամբողջությամբ իրականացնեն ծառայություն «Զվարթնոց» օդանավակայանում»,- ասել է նա և հավելել․ «Անկախության շրջանում Հայաստանը տարբեր ուղղություններով կարողություններ է ձեռք բերում, և այս պահին Հայաստանը ամբողջական կարողություն ունի օդանավակայանում ամբողջությամբ վերահսկողություն իրականացնելու համար։ Հայաստանը իր հստակ դիրքորոշման մասին պաշտոնական նամակով տեղյակ է պահել Ռուսաստանի Դաշնությանը»։ 

Հիշեցնենք՝ ավելի վաղ Դմիտրի Պեսկովը հայտնել է, որ ՌԴ-ին հայտնի չէ Երևանի «Զվարթնոց» օդանավակայանից ռուս սահմանապահներին դուրս բերելու վերաբերյալ որևէ որոշում, աշխատանքներն ընթանում են բոլոր ուղղություններով: