ԱԽ քարտուղարը՝ Սյունիքի մարզից ռուս սահմանապահների դուրսբերման մասին

Հայաստանը քննարկում է տարբեր հարցեր եւ մենք շարունակելու ենք գոյություն ունեցող բոլոր ուղղությունները եւ հարցերը քննարկել. բոլոր հարցերը մեր սեղանին են: Այս մասին ԱԺ-ում լրագրողների հետ զրույցում նշեց ԱԽ քարտուղար Արմեն Գրիգորյանը՝ անդրադառնալով հարցին, թե արդյոք Հայաստանի օրակարգում է ԵՄ անդամակցության թեկնածու դառնալու խնդիրը:

«Մեզ փորձում են դեպի Արևմուտք գնալու, Արևմուտքին աջակցելու առնվազն մեղադրանքներ ներկայացնել: Արևմուտքին ամենաուժեղացնող գործոնն Ուկրաինայի պատերազմն է։ Ուկրաինայի պատերազմի արդյունքում ՆԱՏՕ-ն ընդլայնվել է, առնվազն Ֆինլանդիան ու Շվեդիան մտել են, ԵՄ-ն Ուկրաինայի պատերազմից հետո միահամուռ է։ ԱՄՆ ռազմական արդյունաբերությունը զարգանում է, շատ ինտենսիվ, նաև՝ այդ պատերազմի պատճառով։ ՆԱՏՕ-ն ամենաուժեղն է։ Հիմա կարող ենք հարց տալ՝ էդ մե՞նք ենք արևմուտքին ուժեղացնում, թե էն մարդիկ, որ որոշել են այդ պատերազմն իրականացնել ու պատերազմի արդյունքում Արևմուտքը շատ ուժեղացել է։ Պետք է արևմտամետներ փնտրել ուրիշ տեղ, Հայաստանից դուրս»,-ասել է Գրիգորյանը

Նա նաև նշել է, որ Սյունիքի մարզից ռուս սահմանապահների դուրսբերման հարցը չի քննարկվում: 

Անդրադառնալով Ներքին Հանդի դեպքերին` Գրիգորյանը կրկին պնդեց, որ ԵՄ դիտորդներին ռուս սահմանապահները թույլ չեն տվել մուտք գործել տարածք։