Բայրամովը՝ Բաքվի և Երևանի միջև խաղաղության պայմանագրի շուրջ բանակցությունների մասին

Անթալիայում տեղի ունեցած դիվանագիտական ֆորումի շրջանակներում Ադրբեջանի արտգործնախարար Ջեյհուն Բայրամով խոսելով Բաքվի և Երևանի միջև խաղաղության պայմանագրի շուրջ բանակցություններից ասել է, որ  դրական դինամիկա է նկատվում։ 

«Այս գործընթացում կարևոր են անձնական հանդիպումները։ Վերջին շրջանում կարելի է դրական դինամիկա արձանագրել այդ ուղղությամբ։ Նախ կցանկանայի նշել Մյունխենի անվտանգության համաժողովում Ադրբեջանի նախագահի և Հայաստանի վարչապետի հանդիպումը, որը նախաձեռնել էր Գերմանիայի կանցլերը։ Ընդհանուր առմամբ, այս հանդիպումը դրական ենք գնահատում։ Եվ այդ հանդիպումից հետո որոշում է կայացվել արտգործնախարարների հանդիպում անցկացնելու մասին»:

Բայրամովն ընդգծել է, որ խաղաղության պայմանագիրը պետք է լինի մշտական, որպեսզի հետագայում լրացուցիչ խնդիրներ չստեղծի։ Ադրբեջանի և Հայաստանի միջև խաղաղության հաստատման գործընթացի վերաբերյալ պատվիրակությունների հանդիպումները կարևոր նշանակություն ունեն՝ ընդգծելով, որ վերջին 7 ամսվա ընթացքում խաղաղության համաձայնագրի շուրջ նման կազմով բանակցություններ չէին ընթացել:

Հիշեցնենք, որ Հայաստանի և Ադրբեջանի ԱԳ նախարարների միջև բանակցությունները Բեռլինում մեկնարկել էին փետրվարի 28-ին և շարունակվել փետրվարի 29-ին։