ՌԴ-ն մարտի 1-ից ժամանակավորապես կարգելի բենզինի արտահանումը

Մարտի 1-ից Ռուսաստանում ժամանակավորապես կարգելվի բենզինի արտահանումը: Այս մասին ՏԱՍՍ-ին և Ինտերֆաքսին հայտնել է Ռուսաստանի փոխվարչապետ Ալեքսանդր Նովակի ներկայացուցիչը: Այն մասին, որ վարչապետ Միխայիլ Միշուստինը հավանություն է տվել արտահանման արգելքին՝ պահանջարկի սեզոնային աճի ֆոնին, այսօր գրել է РБК-ն։

Բենզինի արտահանման ժամանակավոր արգելքը կգործի կես տարի։ Նման միջոցը թույլ կտա չեզոքացնել պահանջարկի աճը գարնանային և ամառային ժամանակահատվածներում, ինչպես նաև նավթավերամշակման գործարանի պլանային վերանորոգման ժամանակ, նշել է Նովակի ներկայացուցիչը։

Սահմանափակումը չի վերաբերի Եվրասիական տնտեսական միության երկրներին, Հարավային Օսիային, Աբխազիային, Մոնղոլիային և Ուզբեկստանին:

Բենզինի պահանջարկի աճը փոխհատուցելու համար կառավարությունը նախատեսում է նաեւ բորսայում դիզելային վաճառքի նորմատիվը հասցնել 16 տոկոսի, ասել է փոխվարչապետի ներկայացուցիչը:

Բենզինի և դիզելային վառելիքի արտահանման արգելքը Ռուսաստանում մտցվել է նաև 2023 թվականին, այն ուժի մեջ է մտել սեպտեմբերի 21-ից։ Էմբարգոյի նպատակը ներքին շուկան վառելիքով հագեցնելն ու գների իջեցումն էր։ Հոկտեմբերի 6-ին կառավարությունը թուլացրեց էմբարգոն՝ թույլ տալով դիզելային վառելիքի խողովակաշարային արտահանում: Նոյեմբերի 17-ին չեղարկվել է բենզինի արտահանման, նոյեմբերի 22-ին՝ ամառային դիզվառելիքի արտահանման արգելքը։