Ավանեսյանը՝ իր անձի շուրջ հնարավոր կոռուպցիոն սկանդալների մասին
Մհեր Բիշարյանի գործի մանրամասներին տեղյակ եմ այնքանով, որքանով քննչական մարմինների կողմից մեզ ներկայացվել էր։ Անդրադառնալով «Դատաբժշկական Գիտագործնական կենտրոն»-ի տնօրենին մեղադրանք ներայացնելուն՝ այս մասին լրագրողների հետ զրույցում, ասաց առողջապահության նախարար Անահիտ Ավանեսյանը։
«Այս պահին պարոն Բիշարյանի պաշտոնավարումը կասեցված է, ուրախ եմ, որ դատարանը որոշում է կայացրել կալանքի մասին միջնորդությունը չբավարարել, ընթացքում պարոն Բիշարյանը երբեք չի խուսափել որևէ հարցաքննությունից կամ քննության ընթացքից»,- ասաց նա։
Ավանեսյանի խոսքով՝ ենթադրյալ չարաշահումը եղել է այն ժամանակ, երբ ինքը զբաղեցնում էր առողջապահության փոխնախարարի պաշտոնը։
«Այն, ինչ ես տեսել եմ որոշման մեջ, ինձ ևս հիմնավոր ապացույցներ չեն թվացել, ներկայացված փաստերը լուրջ չթվացին, բայց դա իմ սուբյեկտիվ կարծիքն է»,- նշեց նախարարը։
Լրագրողի դիտարկմանը՝ մտավախություններ չունի, որ իր անձի շուրջ նույնպես կարող են կոռուպցիոն սկանդալներ սկսվել, նախարարը պատասխանեց․ «Ես որևէ մտավախություն չունեմ»։
