Չեմ կարող հերքել, որ կա վտանգ․ Պապիկյան

Անկախ նրանից, թե Ադրբեջանի հետ խաղաղության պայմանագրի ստորագրումից հետո անվտանգային ինչ միջավայր կլինի, Հայաստանի Հանրապետության ԶՈւ–ն շարունակելու է պաշտպանական զենք, զինամթերք գնել։ Այս մասին ՊՆ վարչական համալիրում համատեղ ասուլիսի ժամանակ հայտարարեց ՀՀ պաշտպանության նախարար Սուրեն Պապիկյանը։

Նրա խոսքով՝ այսօր Հայաստանի և Ֆրանսիայի միջև ստորագրված պայմանագրերը հենց դրա մասին են։

«Հայաստանի Հանրապետությունը զենք, զինամթերք գնում է սեփական տարածքային ամբողջականությունը և սուվերենությունը պաշտպանելու նպատակով։ ՀՀ-ի կողմից գնվող զենք, զինամթերքը ուղղված չէ որևէ երկրի նկատմամբ ագրեսիայի։ Իհարկե, չեմ կարող հերքել, որ կա վտանգ, և այն տեսանելի է առկա հռետորաբանությունից։ Մեր պարտավորությունն է պաշտպանել մեր երկրի տարածքային ամբողջականությունն ու սուվերենությունը»,- ասաց Պապիկյանը։

Նա հիշեցրեց, որ ՀՀ-ն որդեգրել է զինված ուժերի կարողությունները նորացնելու և արդիականացնելու քաղաքականություն։ Դա արվում է և՛ սեփական միջոցներով, և՛ եվրոպական երկրների աջակցությունը կօգնի մեր երկրին։