ՏԵՍԱՆՅՈՒԹ. Վլադիմիր Պուտինը թռչել է ամենամեծ գերձայնային ինքնաթիռով

Ռուսաստանի նախագահ Վլադիմիր Պուտինը բարձրացել է արդիականացված ՏՈՒ 160Մ ռազմավարական հրթիռակիրի սրահ (ըստ ՆԱՏՕ-ի կոդավորման՝ Blackjack): Թռիչքը կտևի մինչև 40 րոպե, երթուղին չի բացահայտվում, քանի որ ռազմական գաղտնիք է։ Այս մասին, ՏԱՍՍ-ի փոխանցմամբ, լրագրողներին հայտնել է պետության ղեկավարի մամուլի քարտուղար Դմիտրի Պեսկովը։

Ավելի վաղ Պուտինը ժամանել էր Կազանի Գորբունովի անվան ավիացիոն գործարանի թռիչքուղի։ Թռիչքի համար Պուտինը հագել է հատուկ թռիչքային կոստյում։

Ռուսաստանի ղեկավարը ողջունել է սպասող անձնակազմին, այնուհետև բարձրացել ինքնաթիռ։

Պուտինը հայտարարել է, որ լավ տպավորություններ ունի Տու-160մ-ով թռչելուց: «Մենք նոր տեխնիկա ենք ստանում, տեխնիկան հիանալի է։ Այն, իրոք, նոր սերնդի է», - ասել Է նախագահը:

ՏՈՒ 160Մ-ը ՏՈՒ 160 ինքնաթիռի արդիականացված տարբերակն է: Այն նախագծված է միջուկային և սովորական զենքերով հեռավոր տարածքներում կարևորագույն թիրախներ խոցելու համար: Այն ռազմական ավիացիայի պատմության մեջ ամենամեծ գերձայնային ինքնաթիռն է և աշխարհի ամենածանր մարտական ինքնաթիռը։