Փոխվարչապետը՝ Հայաստանի պահանջով ձերբակալված ադրբեջանցուն ազատ արձակելու մասին
Հայաստանը գործողությունների կդիմի Մոսկվայում ձերբակալված, ապա ազատ արձակված ադրբեջանցի մարդասպանի հարցով։ Այս մասին լրագրողների հետ զրույցում ասաց ՀՀ փոխվարչապետ Մհեր Գրիգորյանը։
«Վստահ եմ, որ գործողություններ կլինեն, բայց հիմա չեմ ուզում ավելի մանրամասն խոսել»,- ասաց նա։
Նրա խոսքով՝ հարցի հետ կապված կոլեգիալ քննարկում պետք է լինի։
«Բերեք առաջ չընկնենք, երբ կլինի պաշտոնական արձագանք՝ կխոսենք»,- նշեց Գրիգորյանը։
Հիշեցնենք՝ Հայաստանի պահանջով Մոսկվայում ձերբակալված ադրբեջանցի մարզիչ Քամիլ Զեյնալլին ազատ է արձակվել Ադրբեջանի կառավարության ջանքերով։ Նրա նկատմամբ սպանության մեղադրանքով միջպետական հետախուզում է հայտարարված։ Զեյնալլին, ով 2020 թվականին Արցախում հայի էր գլխատել, դա լուսանկարել և տարածել իր սոցցանցերում, բերման էր ենթարկվել «Դոմոդեդովո» օդանավակայանից։ Նա 2020-ի հուլիսին իր հայրենակիցներին կոչ էր արել հարձակվել հայերի վրա Մոսկվայում և այլ վայրերում։
