Պուտինը հրադադարը քննարկելու պատրաստակամությու՞ն է հայտնել. Պետդեպարտամենտից մեկնաբանել են
ԱՄՆ իշխանությունները ռուս գործընկերների հետ բանակցություններ չեն վարել Ուկրաինայում հակամարտության դադարեցման հարցի շուրջ, РБК-ին հայտնել են Պետդեպարտամենտի մամուլի ծառայությունից: Տեղեկատվությունը փոխանցում է kommersant.ru-ն: Նախօրեին Reuters-ը, հղում անելով երեք ռուս պաշտոնյաների, հայտնել էր, որ ԱՄՆ-ն մերժել է Ուկրաինայում հրադադարի մասին Ռուսաստանի առաջարկը:
«Մենք հավատարիմ ենք «ոչինչ Ուկրաինայի մասին առանց Ուկրաինայի» սկզբունքին։ Ռուսաստանը կարող է մտածել, որ այս պատերազմը դադարեցնելու ճանապարհը Վաշինգտոնի միջոցով է։ Դա, իհարկե, ճիշտ չէ», - ասվում է Պետդեպարտամենտի հաղորդագրության մեջ։
Պետդեպարտամենտում հավելել են, որ Ռուսաստանը հրապարակային ձևով ազդանշաններ է ուղարկել հակամարտության ավարտի հարցում շահագրգռվածության մասին, սակայն չկան ռուսական իշխանությունների պատրաստակամության նշաններ, որոնք ենթադրում են հրաժարվել նրա նախնական պահանջներից:
Reuters-ի աղբյուրների տվյալներով ՝ 2023 թվականին նախագահ Վլադիմիր Պուտինը Մերձավոր Արևելքում միջնորդների միջոցով ԱՄՆ-ին հաղորդագրություն է փոխանցել Ուկրաինայում հրադադարը քննարկելու պատրաստակամության մասին։ Ընդ որում, ՌԴ-ն պատրաստ չէր զիջել այն տարածքներից ոչ մեկը, որոնց նկատմամբ վերահսկողություն էր ստացել ռազմական գործողությունների ընթացքում։ Գործակալության զրուցակիցներից մեկը հայտարարել է, որ ամերիկյան կողմի հետ բանակցությունները փլուզվել են։
