Սահմանին զորքերի կուտակումներ չկան. Սուրեն Պապիկյան
Պաշտպանության նախարար Սուրեն Պապիկյանն այսօր՝ փետրվարի 2-ին, հարցազրույց է տվել Հանրային հեռուստաընկերությանը։Պետրոս Ղազարյանի հետ զրույցում նախարար Պապիկյանն անդրադարձել է Զինված ուժերում իրականացվող բարեփոխումներին, անվտանգային խնդիրներին։
«Այս պահին կարող ենք գնահատել իբրև հարաբերական կայուն, զորքերի կուտակումներ չկան։ Վերջին մի քանի ամիսների իրավիճակը կայունության ու հանդարտության որոշակի նշաններ է իրենից ներկայացնում»,– ասել է նա:
Ըստ Սուրեն Պապիկյանի՝ Հայաստանը նոր գործընկերներ է ձեռք բերել խոշոր գերտերությունների և այլ բարեկամ երկրների մակարդակով։
«Մեր առաջ խնդիր ենք դրել ապահովելու զենք-զինամթերքի դիվերսիֆիկացիա։ Այս պրոցեսը կարող եմ համարել անդառնալի` դրական առումով, որովհետև հարուցված պրոցեսները էապես փոխելու են վաղվա օրվա մեր բանակի, սպառազինության որակը։ Ձեռք ենք բերել նոր գործընկերներ՝ խոշոր գերտերությունների և այլ բարեկամ երկրների մակարդակով։ Խոսքն առաջին հերթին Հնդկաստանի և Ֆրանսիայի մասին է, բայց նաև կան այլ երկրներ»,-ասաց նախարարը։
