ՆԱՏՕ-ն սկսում է Սառը պատերազմից ի վեր ամենամեծ զորավարժությունները
Հյուսիսատլանտյան դաշինքը հունվարի 22-ին սկսում է վերջին տասնամյակների ընթացքում Steadfast Defender 2024 («Դիմացկուն պաշտպան») քառամսյա խոշորագույն զորավարժությունները, որոնք կոնֆլիկտ են ձեւավորում «գրեթե հավասար հակառակորդի» հետ:
Զորավարժություններին մասնակցելու է մոտ 90 հազար մարդ։ Դրանց կմասնակցեն ՆԱՏՕ-ի բոլոր երկրները և դաշինքին անդամակցելու թեկնածու Շվեդիան։ Զորավարժությունները, որոնք կտեւեն մինչեւ մայիսի վերջ, կընդգրկեն Եվրոպական տարածքը Նորվեգիայից մինչեւ Ռումինիա: ԴՊԱ գործակալության տեղեկություններով՝ Steadfast Defender զորավարժությունների սցենարը Ռուսաստանի հարձակումն է դաշնակիցների տարածքի վրա, որը գործի է դնում ՆԱՏՕ-ի հավաքական պաշտպանության մասին պայմանագրի 5-րդ հոդվածը:
Մինչ այժմ վերջին տասնամյակների ամենախոշոր զորավարժությունները համարվում էին Trident Juncture-ը («Միասնական եռաժանի»), որին 2018 թվականին մասնակցել է ավելի քան 50 հազար զինծառայող: Վերջին համեմատելի զորավարժությունները ՆԱՏՕ-ն անցկացրել է 1988 թվականին՝ դրանցում ներգրավելով ավելի քան 125 000 զինվոր։
Steadfast Defender 2024-ին կմասնակցեն նաև ավելի քան 50 նավ՝ ավիակիրներից մինչև կործանիչներ, ինչպես նաև ավելի քան 80 կործանիչ, ուղղաթիռ և անօդաչու թռչող սարքեր և առնվազն 1100 մարտական մեքենա, ներառյալ 133 տանկ և 533 հետևակային մարտական մեքենա: Ինչպես հայտարարել է Եվրոպայում դաշինքի միացյալ զինված ուժերի գլխավոր հրամանատար Քրիստոֆեր Կավոլին, զորավարժությունները ցույց կտան, որ ՆԱՏՕ-ն կարող է ցամաքային, ծովային, օդային, կիբեռտարածությունում եւ տիեզերքում բարդ գործողություններ իրականացնել եւ աջակցել «մի քանի ամսվա ընթացքում, հազարավոր կիլոմետրերի ընթացքում, հեռավոր հյուսիսից մինչեւ Կենտրոնական եւ Արեւելյան Եվրոպա եւ ցանկացած պայմաններում»:
ՆԱՏՕ-ի ռազմական կոմիտեի ղեկավար Ռոբ Բաուերի խոսքով՝ զորավարժությունների նման մասշտաբը դաշինքի նոր պատրաստվածության ցուցադրումն է:
«Սա ռեկորդային թվով զորքեր է, որոնք մենք կարող ենք օգտագործել և զորավարժություններ անցկացնել նման մասշտաբներով՝ ամբողջ դաշինքով, օվկիանոսով, ԱՄՆ-ից մինչև Եվրոպա»,- ասել է նա: Բացի այդ, ռազմական կոմիտեի ղեկավարն ընդգծել է, որ պատերազմը միայն զինվորականների գործը չէ. «երբ խոսքը վերաբերում է պատերազմին, ինչպես տեսնում ենք Ուկրաինայում, դա ազդում է ողջ հասարակության վրա»:
