Երևանում հաճախակիացել են ինչպես ծառերը վնասելու, այնպես էլ դրանց գողության դեպքերը. Արմեն Բեգոյան

Երևանում ծառերի, կանաչ տարածքը վնասելու դեպքերն անհանգստացնող են։ «Արմենպրես»-ի մամուլի սրահում հրավիրված ասուլիսում Երևանի քաղաքապետարանի «Կանաչապատում և շրջակա միջավայրի պահպանություն» ՀՈԱԿ-ի տնօրեն Արմեն Բեգոյանը նշել է, որ հաճախակիացել են ինչպես ծառերը վնասելու, այնպես էլ դրանց գողության դեպքերը։

«Այս նոր ծառերը, որոնք տնկում ենք, մեծ են, գողանալ հնարավոր չէ, բայց վնասման դեպքերը քիչ չեն։ Շատ են հատկապես թանկարժեք թփատեսակները վնասելու դեպքերը։ Օրինակ, գրեթե ամեն օր ստացել եմ զեկուցագիր կայարանամերձ հրապարակում իլենի կոչվող մշտադալար թփատեսակները գողանալու վերաբերյալ։ Շատ են կազակական գիհիների գողության դեպքերը։ Ծաղիկները գողանալու վրա արդեն չեմ զարմանում»,-ասել է Արմեն Բեգոյանը՝ հավելելով, որ սերտ աշխատում են իրավապահ մարմինների հետ։ «Կանաչապատում և շրջակա միջավայրի պահպանություն» ՀՈԱԿ-ի տնօրենը վստահեցնում է, որ որևէ դեպք բացառություն չի կազմում, բոլոր դեպքերով դիմում են ոստիկանությանը, կան հարուցված քրեական գործեր։

Այս համատեքստում կազմակերպությունը կարևորում է ինչպես վերահսկողական մեխանիզմների ուժեղացումը, այնպես էլ իրազեկման աշխատանքները։ Լայնամասշտաբ կրթական ծրագրեր են իրականացվում դպրոցներում՝ աշակերտներին ներգրավելով գործնական աշխատանքներում։

«Հորդորում եմ մեր քաղաքացիներին լինել ուշադիր, չվնասել կանաչ տարածքները։ Մեր տատիկների, պապիկների տարիքի աշխատողներն են խնամում ծառերը, ծաղկաշատ վայրերը։ Գնահատեք նրանց աշխատանքը։ Մի զլացեք ու փողոցներն անցեք նախատեսված, այլ ոչ թե գազոնների վրայով։ Այս բոլոր աշխատանքն արվում է մեր բոլորի համար»,-ասել է Արմեն Բեգոյանը։