Էկոնոմիկայի նախարարը՝ վրացական պետհամարանիշներով մեքենաների մաքսազերծման մասին
Էկոնոմիկայի նախարարությունն առաջարկել է օրենսդրական լուծումներ վրացական պետհամարանիշներով մեքենաների մաքսազերծման հարցը լուծելու համար։ Sputnik Արմենիայի փոխանցմամբ՝ այս մասին լրագրողների հետ ճեպազրույցում ասել է Էկոնոմիկայի նախարար Վահան Քերոբյանը։
«Այս կարճաժամկետ աջակցության ծրագրից հետո կլինեն այնպիսի կարգավորումներ, որոնք ուղղակի կբացառեն ոչ ԵԱՏՄ համարներով Հայաստանում երկար ժամանակ մեքենա վարելը»,– ասել է նա։
Նա կրկնել է` եթե կա օրենսդրություն, ապա այդ օրենսդրությունը պետք է պահպանվի։
Հիշեցնենք՝ ավելի վաղ հայտնել էինք, որ ՊԵԿ–ը շրջանառության մեջ է դրել մի նախագիծ, որով առաջարկվում է Վրաստանում գրանցված մեքենաները Հայաստանում շահագործելու համար առանձին վճարում անել, այսպես ասած, գրավ վճարել։ Իսկ մինչ այժմ ՀՀ քաղաքացիները Վրաստանում գնած ավտոմեքենան չէին մաքսազերծում, և այն անարգել շահագործում էին ՀՀ տարածքում։
