10 հազար հոգի համ չի ծառայում, համ չի դատվում, համ փող չի տալիս. Կոնջորյան
ՔՊ-ական Հայկ Սարգսյանի ներկայացրած նախագիծը, որով առաջարկվում է 27 տարին լրացած և պարտադիր զինծառայություն չանցած քաղաքացիներին հնարավորություն տալ գումարի դիմաց ազատվելու քրեական պատասխանատվությունից, հետևանքների վերացման դեմ է պայքարում։ Այս մասին այսօր ԱԺ-ում ասաց ԱԺ ՔՊ խմբակցության ղեկավար Հայկ Կոնջորյանը:
«Այս պահի դրությամբ շուրջ 10 հազար քաղաքացի կա, որ գտնվում է հետախուզման մեջ, այդ մարդիկ բանակում չեն ծառայել, հետևաբար, նշանակում է, որ այդ մարդիկ պետք է ենթարկվեն քրեական պատասխանատվության, բայց այդ 10 հազարից մոտ 4-5 հոգին են ենթարկվել քրեական պատասխանատվության։ Ստացվում է, որ 10 հազար հոգի հա՛մ չի ծառայում, հա՛մ չի դատվում, հա՛մ փող չի տալիս»,-ասաց Կոնջորյանը։
Նա Հայկ Սարգսյանին հորդորեց առաջինից երկրորդ ընթերցման ժամանակահատվածում նախագծի շուրջ քննարկումներ ունենալ պատգամավորների և կառավարության գործընկերների հետ` նշելով, որ հարցն էմոցիոնալ է։
Հիշեցնենք, որ ԱԺ–ն առաջին ընթերցմամբ քննարկում է 27 տարին լրացած և պարտադիր զինծառայություն չանցած անձանց մասին կարգավորումը, որը 27 տարին լրացած ու պարտադիր զինծառայություն չանցած զինծառայողներին հնարավորություն կտա անցնելու պարտադիր զինծառայություն` խուսափելով քրեական հետապնդումից հետևյալ կարգավորումներից մեկն ընտրելով` երկու տարի ուղղակի ծառայելով, մեկ տարի ծառայելով ու 2.5 մլն դրամ մուծելով ՀՀ պետբյուջե, վեց ամիս ծառայելով և պետբյուջե վճարելով 5 մլն դրամ, մեկ ամիս ծառայելով` վճարելով 10 մլն դրամ, չծառայելով ու վճարելով 15 մլն դրամ։
