Թող դրան հետևի խաղաղության պայմանագիր կնքումը․ Լուազո
Եվրախորհրդարանի պաշտպանության և անվտանգության հարցերի ենթահանձնաժողովի ղեկավար Նատալի Լուազոն ողջունել է Հայաստանի և Ադրբեջանի հայտարարությունը` այն անվանելով հույսի շող: Այս մասին նա գրառում է արել X-ի իր միկրոբլոգում։
«Թող դրան հետևի խաղաղության պայմանագիր կնքումը»,- գրել է ֆրանսիացի պատգամավորը` հիշեցնելով, որ Հայաստանն ու Ադրբեջանը համաձայնության են եկել գերիների փոխանակման հարցում:
Հիշեցնենք` դեկտեմբերի 7-ին Հայաստանի վարչապետի աշխատակազմը և Ադրբեջանի նախագահի վարչակազմը հրապարակել էին համատեղ հայտարարություն։ Հայաստանի վարչապետի աշխատակազմի և Ադրբեջանի նախագահի վարչակազմի միջև բանակցությունների արդյունքում պայմանավորվածություն է ձեռք բերվել, որ Ադրբեջանն ազատ է արձակում 32 հայ զինծառայողի, իսկ Հայաստանն իր հերթին ազատ է արձակում 2 ադրբեջանցի զինծառայողի։
