Որն է Արևմուտքի մտավախությունը Գազայի հարցում․ ԶԼՄ
Արևմուտքը մտահոգված է, որ Գազայի հատվածում բուֆերային գոտին, որն առաջարկում է ստեղծել Իսրայելը, կդառնա մշտական։ Այս մասին գրում է Haaretz թերթը՝ վկայակոչելով անանուն դիվանագետին։
«Արևմտյան տերությունները մտահոգված են, որ բուֆերային գոտին կդառնա մշտական»,- ասվում է հրատարակության մեջ՝ վկայակոչելով անանուն դիվանագետին:
Ինչպես նշվում է, արևմտյան երկրները քննարկում են՝ աջակցել Գազայի հատվածում բուֆերային գոտի ստեղծելու ծրագրին, քանի որ նրանց պարզաբանում չի տրվել, թե որքան ժամանակ է Իսրայելը ցանկանում պահպանել այն և արդյոք նախատեսում է երկարաժամկետ ռազմական ներկայություն այդ տարածքում:
Հրապարակման մեկ այլ աղբյուր հայտնել է, որ Իսրայելը ռազմական գործողությունների ավարտից հետո բուֆերային գոտի ստեղծելու մանրամասն ծրագիր չունի։
Ավելի վաղ Հորդանանի թագավոր Աբդալլահ II-ը հայտարարել էր, որ իր երկիրը մերժում է ցանկացած սցենար, որը կապված է Իսրայելի կողմից Գազայի հատվածի որևէ տարածքի վերագրավման կամ այնտեղ բուֆերային գոտիների ստեղծման հետ, ինչը միայն կվատթարացնի ճգնաժամը:
Նշվում է, որ հոկտեմբերին Financial Times-ը, վկայակոչելով Իսրայելի գյուղատնտեսության նախարար Ավի Դիխտերին, գրել էր, որ Իսրայելը ծրագրում է բուֆերային գոտի ստեղծել Գազայի հատվածում պաղեստինա-իսրայելական հակամարտության սրման ավարտից հետո։
