Արցախում պայթյունի հետևանքով մահացածների ընտանիքներին գումար կտրամադրվի․ քաղաքապետարանը քննարկում է
Երևանի քաղաքապետարանում քննարկվում է Արցախում Ստեփանակերտ–Ասկերան ավտոճանապարհի հարակից տարածքում` բենզինի պահեստում պայթյունի հետևանքով մահացածների ընտանիքներին աջակցություն տրամադրելու հարցը։ Այս մասին Auroranews-ի հետ զրույցում տեղեկացրեց Երևանքի քաղաքապետի մամուլի քարտուղար Հայկ Կոստանյանը։
«Այո, այս հարցով հիմա քննարկումներ կան»,- մանրամասնեց մամուլի խոսնակը՝ հավելելով, որ գումարի չափը դեռ հստակեցված չէ։
Հիշեցնենք, որ Արցախի նկատմամբ Ադրբեջանի ռազմական ագրեսիայի հետևանքով արցախցիների բռնի տեղահանման ժամանակ սեպտեմբերի 25-ին Ստեփանակերտ-Ասկերան ավտոճանապարհի հարակից տարածքում՝ բենզինի պահեստում ուժեղ պայթյուն էր տեղի ունեցել։
Բենզինի պահեստում ուժեղ պայթյունի հետևանքով, նախնական տվյալներով, զոհվել է մոտ 220 մարդ: ՀՀ քննչական կոմիտեն ևս հստակ տվյալ չունի, քանի որ պատկերն անընդհատ փոխվում է:
