Հարավային Կորեայում ռոբոտը մահացու ճզմել է տղամարդուն՝ վերջինիս շփոթելով բանջարեղենի տուփի հետ

Հարավային Կորեայում ռոբոտը ջախջախել է տղամարդուն, երբ չի կարողացել վերջինիս տարբերել բանջարեղենի տուփից։ Այս մասին գրում է BBC–ի ռուսական ծառայությունը՝ հղում տալով հարավկորեական Yonhap լրատվական գործակալությանը:

Նշվում է, որ ռոբոտաշինության ընկերության մոտ 40-ամյա աշխատակիցը զննում էր ռոբոտին, որի սենսորը նախօրեին խափանվել էր։ Ռոբոտ ձեռքը, շփոթելով տղամարդուն բանջարեղենի տուփի հետ, բռնել է նրան և սեղմել կոնվեյերային գոտուն՝ ճզմելով նրա դեմքն ու կրծքավանդակը։ 

Տղամարդուն տեղափոխել են հիվանդանոց, սակայն կյանքը փրկել չի հաջողվել։ 

Yonhap-ի փոխանցմամբ՝ միջադեպը տեղի է ունեցել պղպեղի դասակարգման գործարանում։ Մահացածը ստուգում էր ռոբոտի սենսորների աշխատանքը նոյեմբերի 8-ին նախատեսված փորձնական մեկնարկից առաջ։ Ռոբոտը պետք է բարձրացներ պղպեղի տուփերը և դրանք դներ ծղոտե ներքնակների վրա: 

Փորձարկումներն ի սկզբանե նախատեսված էին նոյեմբերի 6-ին, սակայն ռոբոտ ձեռքի սենսորի հետ կապված խնդիրների պատճառով դրանք հետաձգվել էին:

Միջադեպից հետո Donggoseong արտահանող գյուղատնտեսական համալիրի, որին պատկանում է գործարանը, խոսնակը հրապարակել է հայտարարություն, որում համալիրը կոչ է արել «ճշգրիտ և անվտանգ» համակարգ ստեղծել: 

Մարտին նմանատիպ դեպք տեղի ունեցավ Հարավային Կորեայում, երբ ավտոպահեստամասերի գործարանի 50-ամյա աշխատողը ծանր վիրավորվեց՝ հայտնվելով ռոբոտ ձեռքի ճանապարհին։