13:00 Լուրերը մեկ տողով. Պայթյուն բենզալցակայանում. Հրթիռի վերին աստիճանը ընկել է Լուսնի մակերևույթին

Անցած ժամվա լուրերը՝ հակիրճ և բովանդակային.

•Արմավիրի մարզում բենզալցակայանի պայթյուն է տեղի ունեցել: Սարդարապատ բնակավայր տանող ճանապարհին գրանցված պատահարի հետևանքով, նախնական տվյալներով, կա երկու տուժած, դեպքի վայրում աշխատում են փրկարարները։

•ՊԵԿ-ը ներկայացրել է էլեկտրամեքենաների ներմուծման արտոնյալ քվոտայի մնացորդները: Ըստ ներկայացված տվյալների՝ դիլեր-դիստրիբյուտորների համար նախատեսված քվոտան սպառվել է 58%-ով, իսկ մյուս սուբյեկտների համար նախատեսված ծավալը՝ 93%-ով։

•Զինծառայողների ծնողները բողոքի ակցիա են անցկացրել Կառավարության շենքի դիմաց: Նրանք պահանջում են ապահովել արդարություն և իրենց զավակների համար ևս կիրառել ծառայության 1.5 տարվա ժամկետը։

•Խորհրդարանական ընդդիմությունը նախաձեռնում է քննարկումներ տնտեսական խնդիրների շուրջ: Նախատեսվում է ԱԺ հանձնաժողովներում քննարկել Ռուսաստանի կողմից հայկական արտադրանքի նկատմամբ կիրառվող սահմանափակումները և դիվանագիտական լուծումներ գտնել։

•Ազգային ժողովում հարթվել է պատգամավորների մասնակցությամբ տեղի ունեցած միջադեպը: Ընդդիմադիր խմբակցության ղեկավարը հայտնել է, որ իրավիճակը կարգավորվել է, և իրենք որոշել են այլևս չանդրադառնալ տեղի ունեցածին։

•Բաքվի վերաքննիչ դատարանն անփոփոխ է թողել հայ գերիների վերաբերյալ դատավճիռները: Արցախի նախկին ռազմաքաղաքական ղեկավարության և մյուս հայերի բողոքները մերժվել են, ինչին բանտից արձագանքել են նաև ապօրինի պահվող գործիչները։

•Պակիստանը կարևորում է Հայաստանի հետ հարաբերությունների ամրապնդումը: Ռուսաստանում Պակիստանի դեսպանը նշել է տարածաշրջանի հետ պատմական կապերի և դիվանագիտական շփումների զարգացման անհրաժեշտության մասին։

•Ուկրաինայի զինված ուժերը հարվածներ են հասցրել ռուսական ռազմավարական օբյեկտներին: Խոցվել են ճակատային գծից հեռու գտնվող նավթավերամշակման գործարաններ, ինչպես նաև Սև ծովում գտնվող նավեր։

•SpaceX-ի հրթիռի վերին աստիճանն ընկել է Լուսնի մակերևույթին: NASA-ն և Եվրոպական աստղադիտարանը հաստատել են չնախատեսված անկման փաստը, որի հետևանքով առաջացած փոշու ամպը ֆիքսվել է աստղադիտակների միջոցով։