Ամերիկյան միջուկային սուզանավը Մերձավոր Արևելքում է

ԱՄՆ «Օհայո» դասի ռազմավարական միջուկային սուզանավն արդեն Մերձավոր Արևելքում է՝ ԱՄՆ Կենտրոնական հրամանատարության պատասխանատվության տարածքում։ Այս մասին նշվում է X սոցցանցում հրամանատարության հաղորդագրության մեջ։ 

«Օհայո» դասի սուզանավերը կազմում են ԱՄՆ ռազմավարական հարձակողական միջուկային ուժերի ողնաշարը: Դրանք հագեցված են միջմայրցամաքային բալիստիկ հրթիռներով։ 

Նախկինում Մերձավոր Արևելք էին ժամանել ամերիկյան երկու հարվածային խմբեր՝ USS Gerald R. Ford և USS Dwight D. Eisenhower ավիակիրների գլխավորությամբ։ Բացի այդ, տարածաշրջան է ուղարկվել լրացուցիչ 300 ամերիկացի զինվորական։ 

ԱՄՆ-ն Մերձավոր Արևելքում իր խմբավորումն ուժեղացրել է Իսրայելի և ՀԱՄԱՍ-ի միջև պատերազմի ֆոնին։ Պենտագոնը դա բացատրել է ցանկացած պետության կամ «ոչ պետական ​​դերակատարի» Գազայի հատվածից դուրս ռազմական գործողությունների էսկալացիայից հետ պահելու ցանկությամբ: Միևնույն ժամանակ հաղորդվում է, որ ամերիկյան իշխանությունները դեռ չեն ծրագրում զորքեր ուղարկել Իսրայել։