Սանոսյանը պարզաբանում է «Հյուսիս-հարավ»-ի կառուցման ընթացքը
Տարածքային կառավարման և ենթակառուցվածքների նախարար Գնել Սանոսյանը դրական է համարում «Հյուսիս–հարավ» ճանապարհի մի շարք հատվածներում շինարարության մեկնարկը։ Այս մասին նա ասաց ԱԺ–ում ճեպազրույցի ժամանակ։
Նախարարը նշեց, որ կառուցվել էր Երևան–Արտաշատ և Երևան–Աշտարակ հատվածն, ապա շինարարությունը կանգնել էր։ Նրա խոսքով` որոշ հատվածների վերաբերյալ դատական հարցեր կան․ դա է պատճառը, որ աշխատանքները կա՛մ կանգ են առել, կա՛մ դանդաղում են, բայց կարծես թե դրանք էլ են լուծում ստանում։
Մեկնարկել է Աշտարակ–Թալին հատվածի շինարարությունը, այդ գործընթացով զբաղվելու է 2 ընկերություն, որոնցից յուրաքանչյուրին 18 ամիս ժամկետ է տրված աշխատանքներն ավարտին հասցնելու համար։ Սանոսյանի խոսքով` Լանջիկ–Գյումրի ճանապարհահատվածի շինարարությունը կավարտվի շուտով, որից հետո աշխատանքները կսկսվեն հարավում` Ագարակ–Քաջարան հատվածում։
«Մենք տրամադրված ենք իրականացնել այս նախագիծը, աշխատում ենք այդ ուղղությամբ, և խնդիրը բնավ ֆինանսների մեջ չէ։ Խնդիրը տարբեր քննարկումների, դժվարությունների, նախագծման և անհամաձայնությունների մեջ է դոնորների հետ և այլն»,– հավելեց նախարարը։
Դրա հետ մեկտեղ նախարարը կոնկրետ ժամկետներ չնշեց, թե երբ ճանապարհը լիովին պատրաստ կլինի։ Նրա խոսքով` ճանապարհի տարբեր հատվածների շինարարությունը սկսվել է տարբեր ժամանակներում և տարբեր ժամանակ է պահանջում ավարտելու համար:
