Ադրբեջանի չորս դպրոցներում ավելի քան 20 երեխա է թունավորվել
Բաքվի մոտակայքում գտնվող Բինա գյուղի չորս դպրոցներում զանգվածային թունավորումներ են տեղի ունեցել, 21 աշակերտ հոսպիտալացվել է, հայտնում է Ադրբեջանի Բժշկական տարածքային ստորաբաժանումների կառավարման ասոցիացիայի (TƏBİB) մամուլի ծառայությունը։
«Բինա գյուղում երեխաների թունավորման դեպքի առթիվ Շտապօգնության և շտապ բուժօգնության հանրապետական կենտրոնում ահազանգեր են ստացվել գյուղի 88, 117, 121 և 149 միջնակարգ դպրոցներից, ինչպես նաև տարբեր բնակելի շենքերից։ Սաբունչու շրջանի բժշկական կենտրոնի թիվ 5 հիվանդանոցում հոսպիտալացվել է 21 երեխա։ Նրանցից յուրաքանչյուրը ստացել է անհրաժեշտ բուժօգնություն։ Աշակերտները սնունդ են գնել Բինա գյուղի սննդի կետերից մեկում»,- ասվում է հաղորդագրության մեջ։
