ԱՄՆ-ի, Իսրայելի և Կատարի միջև բանակցությունները ՀԱՄԱՍ-ի հետ 50 պատանդների վերաբերյալ ձախողվել են․ WSJ

ԱՄՆ-ի, Իսրայելի և Կատարի միջև բանակցությունները պաղեստինյան ՀԱՄԱՍ շարժման հետ՝ 50 պատանդների ազատ արձակման համար, ձախողվել են։ Գործարքի ձախողման պատճառները չեն նշվում։ Գրել է The Wall Street Journal-ը՝ վկայակոչելով պաշտոնյաներին։

Ըստ WSJ-ի աղբյուրների՝ Իսրայելի հետ պատերազմի սկզբնական օրերին ՀԱՄԱՍ-ը հրաժարվել էր պատանդների վերաբերյալ բանակցություններից։

Ավելի ուշ, ԱՄՆ-ի և Կատարի միջնորդությամբ, կողմերը սկսել են քննարկել գործարքի հնարավոր պայմանները, այդ թվում՝ ժամանակավոր զինադադար, Գազայի հատված ջրի մատակարարման վերականգնում և մարդասիրական օգնության ավելացում։

Երեկ՝ հոկտեմբերի 20-ին, ՀԱՄԱՍ-ն ազատ է արձակել երկու պատանդների՝ ԱՄՆ քաղաքացիներ Ջուդիթ և Նատալի Ռաանաններին։ Գրոհայինների ռազմական թեւը բացատրել է, որ որոշումը կայացվել է «մարդասիրական նկատառումներով»։ Կատարը միջնորդի դեր է կատարել բանակցություններում։ Հրապարակվել են նաև կադրեր։

ՀԱՄԱՍ-ն ավելի վաղ հայտնել էր, որ պատանդ է պահում ավելի քան 200 իսրայելցիների և մի քանի տասնյակ օտարերկրացիների։