ԱՄՆ-ի ուժերը կբավականացնեն Կիևի, Իսրայելի և Ասիայի համար. Սպիտակ տուն
Միացյալ Նահանգները բավականաչափ ուժեր ունի՝ աջակցելու Ուկրաինային, ինչպես նաև Իսրայելին և դաշնակիցներին Հնդկական-Խաղաղօվկիանոսյան տարածաշրջանում: Այդ մասին ճեպազրույցում հայտարարել է ԱՄՆ նախագահի ազգային անվտանգության հարցերով խորհրդական Ջեյք Սալիվանը։
Նա հավելել է, որ ամերիկյան իշխանությունները մտադիր են յուրաքանչյուր ուղղությամբ աշխատանքներ տանել միաժամանակ։
Ավելի վաղ ԱՄՆ նախագահ Ջո Բայդենը ելույթ է ունեցել Մերձավոր Արևելքում տիրող իրավիճակի վերաբերյալ։ Նա ասել է, որ Իսրայելն իրավունք ունի պատասխանելու ՀԱՄԱՍ-ի ահաբեկչական հարձակմանը, և ԱՄՆ-ն կապահովի, որ նա ունենա դրա բոլոր հնարավորությունները։
Նա խոստացել է Կոնգրեսի հետ քննարկել Իսրայելին օգնություն հատկացնելու հարցը։
Միաժամանակ ակնկալվում է, որ չորեքշաբթի՝ հոկտեմբերի 11-ին, կարող է հայտարարվել Ուկրաինային 200 մլն դոլարի ռազմական օգնության նոր փաթեթի մասին։
