ՄԱԿ-ի ԱԽ-ն չի կարողացել միասնական հայտարարության հասնել Իսրայելի և Պաղեստինի հարցով
ՄԱԿ-ի Անվտանգության խորհուրդը փակ դռների հետևում արտակարգ նիստ է անցկացրել Իսրայելի և Պաղեստինի միջև պատերազմի ֆոնին, սակայն չի կարողացել հասնել միասնական հայտարարության, հայտնում է Al Jazeera-ն։
Միացյալ Նահանգները խորհրդի 15 անդամներին կոչ է արել խստորեն դատապարտել ՀԱՄԱՍ-ին։
«Շատ երկրներ կան, որոնք դատապարտել են ՀԱՄԱՍ-ի հարձակումները։ Ակնհայտ է, որ ոչ բոլորը»,- հանդիպումից հետո լրագրողներին ասել է ամերիկացի ավագ դիվանագետ Ռոբերտ Վուդը:
Խորհուրդը մոտ 90 րոպե նիստ է արել և լսել ՄԱԿ-ի Մերձավոր Արևելքի խաղաղության բանագնաց Թոր Վենեսլանդի խոսքը: Դիվանագետներն ասել են, որ ՄԱԿ-ի Անվտանգության խորհրդի անդամները ավելի լայն ուշադրության հույս են ունեցել, քան ՀԱՄԱՍ-ին դատապարտելը:
«Իմ ուղերձն էր անհապաղ դադարեցնել մարտերը և անցնել հրադադարի և բովանդակալից բանակցությունների, ինչի մասին Անվտանգության խորհուրդը խոսում է տասնամյակներ շարունակ», - ասել է ՄԱԿ-ում Ռուսաստանի դեսպան Վասիլի Նեբենզյան:
