Իսրայելական բանակը շատ դժվար մարտեր է մղել ՀԱՄԱՍ-ի դեմ 22 շրջաններում. բանակի ներկայացուցիչ

Իսրայելի պաշտպանության բանակի խոսնակ, բրիգադային գեներալ Դանիել Հագարին հաստատել է, որ ՀԱՄԱՍ-ի զինյալները պատանդ են վերցրել իսրայելցի մի քանի խաղաղ բնակիչների և զինվորականների։ Գեներալի խոսքերը մեջբերում է CNN-ը։ 

«Կան ՀԱՄԱՍ–ի կողմից գերեվարված պատանդներ և ռազմագերիներ: Իսրայելի պաշտպանության բանակի զինծառայողների թվում կան զոհեր: Մենք դեռ հստակ թիվ չունենք՝ մենք պատերազմական վիճակում ենք»,- ասել է Դանիել Հագարին։ 

Նրա խոսքով՝ իսրայելական բանակը շատ դժվար մարտեր է մղել ՀԱՄԱՍ-ի դեմ 22 շրջաններում։ «Մեր նպատակն է ոչնչացնել բոլոր ահաբեկիչներին, ովքեր ներթափանցել են Իսրայել, մաքրել բոլոր օբյեկտները», - ասել է նա (մեջբերում է Haaretz-ը): 

Պաղեստինյան «Իսլամական ջիհադ» կազմակերպությունը, որը միացել է ՀԱՄԱՍ-ի «Ալ-Աքսա ջրհեղեղ» գործողությանը, հայտարարել է, որ պատանդ է վերցրել տղամարդկանց, կանանց և երեխաների: «Բոլոր բանտարկյալները, որոնք գտնվում են դիմադրության կազմակերպությունների ձեռքում, կպահվեն այնքան ժամանակ, քանի դեռ մեր բոլոր բանտարկյալներն ազատ չեն արձակվել իսրայելական բանտերից», - ասել է «Իսլամական ջիհադի» խոսնակ Դաուդ Շիհաբը, որի խոսքերը մեջբերում է Haaretz-ը: