Ռուսական խաղաղապահ առաքելությունը մինչև նոյեմբերի 1-ը դուրս կգա՞ Արցախից

Համացանցում եւ որոշ թելեգրամյան ալիքներում տեղեկություն է տարածվում, թե մինչեւ 2023 թ-ի նոյեմբերի 1-ը ռուսական խաղաղապահ առաքելությունն ամբողջությամբ դուրս կգա Արցախից։ Auroranews-ը տեղեկությունը ճշտելու համար փորձեց կապ հաստատել Հայաստանում Ռուսաստանի դեսպանատուն։ 

Մեր զանգերը մնացին անպատասխան։ ՀՀ ԱԳՆ-ից մեզ ասացին հարցը պետք է ուղղեք ՌԴ կողմին՝ ըստ կարգի և իրենց տրամադրած կոնտակտային միջոցներով: ՀՀ կառավարություն եւս մեր զանգերն անպատասխան են։ 

Հիշեցնենք, որ Արցախյան 44-օրյա պատերազմից հետո Հայաստանի վարչապետի, Ադրբեջանի և Ռուսաստանի նախագահների՝ նոյեմբերի 9-ի համատեղ հայտարարությամբ նշվեց, որ Լեռնային Ղարաբաղում շփման գծի երկայնքով և Լաչինի միջանցքի երկայնքով տեղակայվում է Ռուսաստանի խաղաղապահ զորախումբ։ Նոյեմբերի 9-ի համատեղ հայտարարության համաձայն՝ խաղաղապահ զորակազմը ԼՂ-ում տեղակայվել է 5 տարի ժամկետով։ 

Ժամկետն ինքնաբերաբար կերկարաձգվի հերթական 5-ամյա ժամկետով, եթե կողմերից որևէ մեկը տվյալ ժամկետի ավարտից 6 ամիս առաջ չհայտարարի սույն դրույթի կիրառումը դադարեցնելու մտադրության մասին: Երեկ էլ ՌԴ ԱԳՆ պաշտոնական ներկայացուցիչ Մարիա Զախարովան հայտարարեց որ Լեռնային Ղարաբաղում ռուս խաղաղապահների տեղակայման ժամկետները և այլ հարցեր կորոշվեն ադրբեջանցի գործընկերների հետ համատեղ:

[37d6db36cdb14d56dcec48057969f3c2.png]