Մակրոնը ՀՀ-ին դրդում է պատասխանատվությունը գցել մեզ վրա. Զախարովա

Ֆրանսիայի նախագահ Էմանուել Մակրոնը ՀՀ իշխանություններին դրդում էր իրավիճակի հետ կապված պատասխանատվությունը բարդել Ռուսաստանի վրա։ Այս մասին ճեպազրույցի ժամանակ ասել է ՌԴ ԱԳՆ պաշտոնական ներկայացուցիչ Մարիա Զախարովան։

Զախարովայի խոսքով` նման բան կարող են ասել վառ երևակայություն ունեցող մարդիկ։ Գուցե Ֆրանսիայի նախագահը գիտի մի բան, որը չգիտի ոչ ոք։

«Կուզեինք, որ նա ներկայացներ իր տեսակետը և մենք հասկանայինք, թե ինչ է նկատի ունեցել։ Նման հայտարարություններով Մակրոնը բացահայտում է տեղի ունեցողի մեխանիզմը։ Մենք մինչ այդ ասում էինք, որ Երևանի պաշտոնական դեմքերը շարունակում են իրենց արարքների պատասխանատվությունը այլոց վրա բարդելու փորձերը։ Իսկ հիմա տեսնում ենք, թե ով է նրանց դրդում դրան», – ասել է Զախարովան։

Նա հավելել է, որ Մոսկվան լավ է ճանաչում ֆրանսիական իշխանությունների հնարքները։ Ըստ նրա` ակնհայտ է հայ–ադրբեջանական կարգավորման գործընթացքում դրանց կողմնակալությունը։

Ավելի վաղ Մակրոնը ՌԴ–ն անվանել էր «Ադրբեջանի հանցակից»` Հայաստանի տարածքային ամբողջականությանը սպառնալու առումով։