Բլինկենն Ալիևի հետ խոսել է Լեռնային Ղարաբաղում ստեղծված իրավիճակի մասին

ԱՄՆ պետքարտուղար Էնթոնի Բլինկենը Ադրբեջանի նախագահ Իլհամ Ալիևի հետ հեռախոսազրույցում ընդգծել է Լեռնային Ղարաբաղի բնակիչների համար անվտանգության երաշխիքների և նրանց իրավունքների պաշտպանության անհրաժեշտությունը: Այս մասին ասված է Պետդեպարտամենտի մամուլի ծառայության ղեկավար Մեթյու Միլլերի գրավոր հայտարարության մեջ, հաղորդում է ՏԱՍՍ–ը։

Նրա խոսքով՝ Բլինկենը նշել է, որ անհրաժեշտ է, որպեսզի Ադրբեջանը զերծ մնա Լեռնային Ղարաբաղում հետագա ռազմական գործողություններից և ապահովի անարգել հումանիտար հասանելիություն:

Բլինկենն Ալիևին կոչ է արել Լեռնային Ղարաբաղի բնակիչներին երաշխիքներ տալ, որ նրանք կկարողանան անվտանգ ապրել իրենց տներում, իսկ նրանց իրավունքները պաշտպանված կլինեն:

«Պետքարտուղարը կոչ է արել նախագահ Ալիևին պարտավորություններ ստանձնել լայն համաներում անցկացնելու և Լեռնային Ղարաբաղ միջազգային դիտորդական առաքելություն թույլ տալու համար, ինչպես նաև նշել է նախագահի կողմից հրապարակայնորեն արտահայտված հավատարմությունը Լեռնային Ղարաբաղում բոլորի համար խաղաղության, փոխըմբռնման և փոխադարձ հարգանքի հիման վրա ապագա ապահովելուն», - հայտնել Է Միլլերը: