Թուրքիայի ԱԳՆ ղեկավարը՝ Արցախում Ադրբեջանի ռազմական ագրեսիայի մասին

Թուրքիայի արտգործնախարար Հաքան Ֆիդանը հայտարարել է, թե Ադրբեջանը ստիպված է եղել Լեռնային Ղարաբաղում գործողություն իրականացնել:

«Ադրբեջանը ստիպված եղավ գործողություն իրականացնել Լեռնային Ղարաբաղում, ինչը նոր հնարավորություն բացեց Հայաստանի հետ հարաբերությունները կարգավորելու համար»,– հայտարարել է թուրք նախարարը։ 

Այսօր ավելի վաղ Հարավային Կովկասում Եվրամիության հատուկ ներկայացուցիչ Տոյվո Կլաարի հետ հանդիպմանը Ադրբեջանի նախագահ Իլհամ Ալիևը հայտարարել է, թե Լեռնային Ղարաբաղում հակաահաբեկչական գործողությունից հետո ավելի բարենպաստ պայմաններ են ստեղծվել Բաքվի և Երևանի միջև խաղաղության պայմանագրի կնքման համար։ 
 

Սեպտեմբերի 19-ին Ադրբեջանը լայնամասշտաբ հարձակում էր սկսել Արցախի Հանրապետության նկատմամբ։ Ադրբեջանի ՊՆ-ն նշել էր, թե իբր «քաղաքացիական բնակչությունը և քաղաքացիական ենթակառուցվածքի օբյեկտները թիրախ չեն, շարքից հանվում են միայն «ռազմական թիրախները»»: 

Վերջին տվյալներով՝ Արցախի դեմ ադրբեջանական ագրեսիայի հետևանքով կա 200 զոհ (10 խաղաղ բնակիչ, այդ թվում՝ 5 երեխա) և 400 վիրավոր (40 խաղաղ բնակիչ, այդ թվում՝ 13 երեխա)։

Արցախի ԱԺ պատգամավոր Նելլա Գրիգորյանը այսօր հայտնել է, որ Արցախում նախնական տվյալներով՝ 300-ից ավելի անհետ կորածներ կան, մոտ 300 զոհ։