ԵՄ-ն և ԱՄՆ-ն ապակայունացում են բերում Հարավային Կովկաս. Լավրով

ԵՄ-ն և ԱՄՆ-ն ապակայունացնում են իրավիճակը Հարավային Կովկաս՝ փորձելով իրենց միջնորդական ջանքերը պարտադրել Հայաստանին և Ադրբեջանին։ Այս մասին ՄԱԿ-ի Գլխավոր ասամբլեայի նիստում հայտարարել է ՌԴ արտաքին գործերի նախարար Սերգեյ Լավրովը։
 

«Այժմ, երբ Երևանի և Բաքվի ղեկավարները միմյանց միջև կարգավորել են երկու երկրների ինքնիշխանության փոխադարձ ճանաչման հարցը, եկել է խաղաղ կյանքի, դրա հաստատման և վստահության ամրապնդման ժամանակը»,– ասել է նա:
 

Լավրովի խոսքով` ՌԴ խաղաղապահ զորակազմն ամեն կերպ կնպաստի դրան։

Սեպտեմբերի 19-ին Ադրբեջանը լայնամասշտաբ հարձակում էր սկսել Արցախի Հանրապետության նկատմամբ։ Ադրբեջանի ՊՆ-ն նշել էր, թե իբր «քաղաքացիական բնակչությունը և քաղաքացիական ենթակառուցվածքի օբյեկտները թիրախ չեն, շարքից հանվում են միայն «ռազմական թիրախները»»: 

Վերջին տվյալներով՝ Արցախի դեմ ադրբեջանական ագրեսիայի հետևանքով կա 200 զոհ (10 խաղաղ բնակիչ, այդ թվում՝ 5 երեխա) և 400 վիրավոր (40 խաղաղ բնակիչ, այդ թվում՝ 13 երեխա)։