Ընտրատեղամասում գրանցվելուց հետո երկու քաղաքացիները հայտարարել են, որ չեն ցանկանում քվեարկել

Քանաքեռ-Զեյթուն վարչական շրջանի 3/28 ընտրատեղամասում («թիվ 152 մսուր-մանկապարտեզ») ՀՈԱԿ-ի ընտրատեղամասում երկու քաղաքացի համապատասխան գրանցում անցնելուց հետո ստացել են քվեաթերթիկները։ Այս մասին գրում է «Հետքը»։ 

Նշվում է, որ քվեախցիկից դուրս գալուց հետո հայտարարել են, որ չեն ցանկանում քվեարկել և հեռացել են ընտրատեղամասից։ Հանձնաժողովի նախագահը հայտնեց, որ դեպքի վերաբերյալ կազմվել է արձանագրություն, իսկ ծրարները պահվել են՝ դրոշմանիշների թվի անհամապատսխանությունից խուսափելու համար։ Հանձնաժողովի նախագահը նշեց, որ այլ միջադեպեր չեն գրանցվել։

Այս ընտրատեղամասում ընտրողների թիվը 1857 է, որոնցից ժամը 11։00-ի դրությամբ քվեարկությանը մասնակցել է 124-ը, կամ 7%-ը։

Հիշեցնենք, որ այսօր՝ սեպտեմբերի 17-ին՝ առավոտյան ժամը 08:00-ի դրությամբ, բացվել են Երևանի ողջ տարածքում ձևավորված 10 ընտրատարածքների 475 տեղամասերը: Քվեարկությունը կավարտվի ժամը 20:00-ին, որից հետո կսկսվի ձայների հաշվարկը: