Լեհաստանի վարչապետը վերջնագիր է ուղարկել ԵՀ՝ արգելելով ուկրաինական հացահատիկի ներկրումը
Լեհաստանի վարչապետ Մատեուշ Մորավիեցկին հայտարարել է, որ վերջնագիր է ուղարկել Եվրահանձնաժողով՝ երկարաձգելու ուկրաինական հացահատիկի ներմուծման արգելքը․
«Ես վերջնագիր ուղարկեցի Եվրահանձնաժողովին, միանշանակ պահանջեցի՝ կա՛մ դուք սեպտեմբերի 15-ին երկարաձգեք չորս տեսակի ուկրաինական հացահատիկի ներկրման արգելքը, կա՛մ մենք կերկարաձգենք արգելքը, քանի որ չենք կարող համաձայնել վնասել լեհական շուկան»,-ընդգծել է նա։
Քաղաքական գործչի խոսքով՝ Վարշավան ձգտում է ստեղծել այնպիսի պայմաններ, որոնք կհամապատասխանեն ինչպես Ուկրաինային, այնպես էլ Լեհաստանին, սակայն առաջնային է տեղի ֆերմերների անվտանգությունը։
Անցյալ շաբաթ Մորավիեցկին ասել էր, որ հանրապետությունն, անկախ Եվրահանձնաժողովի որոշումից, կերկարաձգի Ուկրաինայից հացահատիկի ներկրման արգելքը՝ պահպանելով տարանցման իրավունքը։
