Խոշոր ավտովթար Երևանում. 5 վիրավորներից 3-ը երեխաներ են
Այսօր՝ օգոստոսի 28-ին, խոշոր ավտովթար է տեղի ունեցել Երևանում: Ժամը 15:10-ի սահմաններում Արզումանյան և Հալաբյան փողոցների խաչմերուկում բախվել են Lexus GX 470 մակնիշի և Opel մակնիշի ավտոմեքենաները: Այս մասին հայտնում է shamshyan.com-ը:
Ինչպես հայտնում է լրատվականը, վթարի հետևանքով 5 հոգի, որոնցից 3-ը երեխաներ են, տեղափոխվել են «Սուրբ Աստվածամայր» բժշկական կենտրոն:
Վիրավորներին առաջինը օգնության են հասել քաղաքացիները և շտապօգնության բժիշկների հերթապահ խումբը:
Բախման հետևանքով Lexus-ը դուրս է եկել երթևեկելի գոտուց, բախվել մայթին տեղադրված երկաթե ճաղավանդակին, կոտրել այն և մասամբ հայտնվել մայթին:
Վթարի մասին ՊԾ Երևան քաղաքի գնդից տեղեկությունը փոխանցել են Հայաստանի Քննչական կոմիտեի Երևան քաղաքի քննչական վարչության ճանապարհատրանսպորտային հանցագործությունների քննության բաժին:
Վթարի փաստով քննչական բաժնում նախաձեռնվել է վարույթ:
Պարեկային ծառայությունն ու քննչական բաժինը պարզում են վարորդների և վիրավորների ինքնությունը:
Ծանուցում. Ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով։
