Կա՞ արդյոք որոշում ՀՀ զինանշանը փոփոխելու. ՔՊ պատգամավորները պատասխանել են հարցին

Այսօր՝ խորհրդարանական ճեպազրույցի ժամանակ, լրագրողները, դիմելով ԱԺ «Քաղաքացիական պայմանագիր» խմբակցության պատգամավոր Արթուր Հովհաննիսյանին, հարցրել են՝ կա՞ զինանշանը փոփոխելու որոշում:

Արձագանքելով՝ պատգամավորը ուշադրություն հրավիրեց այն բանի վրա, որ վարչապետն ասել է՝ կիսվում է իր մտքերով, և բոլորը կարող են միանալ այդ քննարկումներին:

«Որևէ պատկերացում այս պահն չեմ կարող հնչեցնել: Բնականաբար, կարող եմ ունենալ սեփական պատկերացումները, բայց իշխանությունը, որպես այդպիսին, որոշում չունի որևէ նախաձեռնությամբ հանդես գալու: Վարչապետը բացել է խոսակցություն, բոլորդ կարող եք միանալ այդ խոսակցություններին»,- ասել է ՔՊ քարտուղարը:

ՔՊ խմբակցության պատգամավոր Բաբկեն Թունյանն էլ նշել է, որ թե՛ զինանշանի, թե՛ օրհներգի մասով միշտ նման խոսակցություններ եղել են տարբեր շրջանակների կողմից: 

«Եթե մի պահ պատկերացնենք, որ այդ զինանշանը ներկայացվել է այսօր, ես գրեթե համոզված եմ, որ դահլիճում նստած յուրաքանչյուրիդ մոտ դրա հետ կապված տարբեր կարծիքներ կարող են լինել, բայց դա ամենակարևոր օրակարգային հարցը չէ, ընդամենը թեմա է, որի մասին կարելի է մտածել»:

Հիշեցնենք՝ Նիկոլ Փաշինյանը երեկ՝ հունիսի 16-ին, ազգային ժողովում 2022 թվականի պետբյուջեի տարեկան հաշվետվության քննարկմանն ասել է, թե մեր զինանշանը մեր պետության հետ ի՞նչ կապ ունի: