Կոսովոյում շարունակվում է Զվեցանի, Լեպոսավիչի, Զուբին Պոտոկի և Սեվերնա Միտրովիցայի մունիցիպալիտետների սերբ բնակչության առճակատումը Կոսովոյի ոստիկանության և միջազգային անվտանգության ուժերի հետ։

Սերբիայի իշխանություններն արդեն լիարժեք պատրաստության են բերել  բանակը։ Զորքեր են ուղարկվել Կոսովոյի հետ սահման, որտեղ մայիսի 25-ին իրականացվել է մունիցիպալիտետների ընտրված քաղաքապետների երդմնակալության արարողությունը։

Սակայն սերբերը վիճարկում են քվեարկության օրինականությունը, քանի որ ընտրություններին մասնակցել է բնակչության 3%-ից մի փոքր ավելին։ Երկուշաբթի տեղի ունեցած վերջին բախումների ժամանակ վիրավորների թվում են եղել Իտալիայից ժամանած ՆԱՏՕ-ի 11 զինվորներ, որոնցից 3-ը դեռ ծանր վիճակում են: 

Սերբ քաղաքական գործիչները կարծում են, որ ստեղծված իրավիճակը կարող է հրահրել հակամարտության թեժ փուլի մեկնարկը։ Իսկ պատգամավոր Իվան Կոստիչն ակնկալում է, որ նախագահ Ալեքսանդր Վուչիչը կդիմի Ռուսաստանի օգնությանը։