Նիկոլ Փաշինյանը հունիսին գալու է քննիչ հանձնաժողով. Անդրանիկ Քոչարյան
ՀՀ վարչապետ Նիկոլ Փաշինյանը հունիսին կներկայանա 44-օրյա պատերազմի հանգամանքներն ուսումնասիրող քննիչ հանձնաժողով: News.am–ի հետ զրույցում տեղեկությունը ասել է ԱԺ «Քաղաքացիական պայմանագիր» խմբակցության պատգամավոր, պաշտպանության և անվտանգության հարցերի հանձնաժողովի նախագահ Անդրանիկ Քոչարյանը։
«Քննիչ հանձնաժողովը ստեղծվել է պատերազմում պարտության պատճառները և դրանում մեր մեղքերը հասկանալու համար։ Վարչապետը ցանկություն ունի և հունիսին գալու է քննիչ հանձնաժողով, այնտեղ շատ հարցերի պատասխաններ կհնչեն, որոնք հասանելի կլինեն բոլորին` ժողովրդին, քաղաքական ուժերին»,– նշել է Քոչարյանը։
Հիշեցնենք` 44-օրյա պատերազմի պատճառներն ու հանգամանքներն ուսումնասիրող հանձնաժողովը ստեղծվել է 2022 թվականի հոկտեմբերի 10-ին։ Այս ընթացքում հանձնաժողովը ստացել է 4154 գաղտնի և հույժ գաղտնի տեքստային ու գրաֆիկական փաստաթուղթ` ընդհանուր 14.000 էջից ավելի ծավալով։
