Մենք պետք է միշտ պատրաստ լինենք. Ալիևն ասել է, որ կավելացնեն պաշտպանական ծախսերը 2023-ի պետբյուջեում
Ադրբեջանի իշխանությունները 2023 թվականի պետական բյուջեն վերանայելիս կավելացնեն պաշտպանության ոլորտի ֆինանսավորումը, այսօր հայտարարել է երկրի նախագահ Իլհամ Ալիևը:
«Ղարաբաղյան երկրորդ պատերազմից հետո մենք կանգ չենք առել, ընդհակառակը՝ առաջ ենք գնում։ Այս տարվա պետբյուջեում լրացումներ կկատարվեն, մի զգալի մասը կրկին նախատեսված է պաշտպանական նպատակներով։ Ինչո՞ւ։ Որովհետև մենք պետք է միշտ պատրաստ լինենք։ Սպառնալիքներն աճում են, վտանգը մեծանում է, և մենք պետք է կարողանանք հաղթահարել ցանկացած սպառնալիք», - ասել է Ալիևը:
Նրա խոսքով, ադրբեջանական բանակը թե՛ տեխնիկայով, թե՛ մարտունակությամբ աշխարհի ամենաուժեղ բանակների թվում է։
«Բանակի կառուցումը դեռ ապահովված է պատշաճ մակարդակով, և կշարունակվի ապահովել»,- ընդգծել է Ալիևը։
Ավելի վաղ հաղորդվել էր, որ Ադրբեջանի 2023-ի պետբյուջեն պաշտպանության և ազգային անվտանգության միջոցառումների ֆինանսավորման համար նախատեսում է 5,3 մլրդ մանաթ (ընթացիկ փոխարժեքով ավելի քան 3,1 մլրդ դոլար) կամ պետական բյուջեի ծախսերի 16 տոկոսը:
