Վաշինգտոնում կայացած հայ-ադրբեջանական բանակցություններից հետո Բայրամովն ու Չավուշօղլուն հեռախոսազրույց են ունեցել
Ադրբեջանի և Թուրքիայի արտգործնախարարներ Ջեյհուն Բայրամովը և Մևլութ Չավուշօղլուն հեռախոսազրույց են ունեցել, հայտնում է interfax.az-ը։
«Զրույցի ընթացքում նախարարները մտքեր են փոխանակել Ադրբեջանի և Թուրքիայի միջև երկկողմ և բազմակողմ համագործակցության և տարածաշրջանում առկա իրավիճակի շուրջ։ Արտգործնախարարները նաև քննարկել են ԱՄՆ-ում (մայիսի 1-4) Ադրբեջանի և Հայաստանի միջև խաղաղության պայմանագրի նախագծի շուրջ (ԱԳ նախարարների մակարդակով) բանակցությունները», - ասվում է Ադրբեջանի ԱԳՆ մամուլի ծառայության հաղորդագրության մեջ։
Նշվում է նաև, որ հեռախոսազրույցի ընթացքում նախարարներն անդրադարձել են նաև փոխադարձ հետաքրքրություն ներկայացնող այլ հարցերի։
Հիշեցնենք` երեկ երեկոյան Վաշինգտոնում ավարտվել են Միրզոյանի և Բայրամովի 4-օրյա բանակցությունները: ԱՄՆ պետքարտուղար Էնթոնի Բլինքենը հայտնել էր, որ կողմերը վերջին օրերին բարդ հարցեր են քննարկել և առարկայական առաջընթաց արձանագրել խաղաղության պայմանագրի հարցում։
