Ուկրաինայում մերժել են զինադադար հաստատելու Լուկաշենկոյի առաջարկը
Ուկրաինայի նախագահի խորհրդական Միխայիլ Պոդոլյակը հրաժարվել է Ուկրաինայում դադարեցնել ռազմական գործողությունները՝ «առանց երկու կողմերից զորքերը տեղաշարժելու և վերախմբավորելու իրավունքի»։ Ավելի վաղ նման կոչով հանդես էր եկել Բելառուսի նախագահ Ալեքսանդր Լուկաշենկոն։
«Ցանկացած զինադադար կնշանակի Ռուսաստանի Դաշնության իրավունքը՝ մնալու օկուպացված տարածքներում։ Սա բացարձակապես անընդունելի է։ Ուկրաինան իրավունք ունի զորքեր և տեխնիկա տեղափոխել իր տարածքով, ինչպես որ հարմար է գտնում», - մեկնաբանել է Զելենսկու օգնականը Լուկաշենկոյի առաջարկը։
Հիշեցնենք, որ ՌԴ ԱԳՆ-ն ավելի վաղ հայտարարել էր, որ Ռուսաստանը չի հրաժարվում հակամարտության դիվանագիտական կարգավորումից և խաղաղ բանակցություններից, սակայն Զելենսկին արգելել է օրենսդրական մակարդակով ցանկացած բանակցություն։ Վաշինգտոնը մերժել է հակամարտությունը խաղաղ ճանապարհով լուծելու Չինաստանի ծրագիրը և հայտարարել, որ Ուկրաինայում զինադադարի դեպքում Ռուսաստանը կխախտի ՄԱԿ-ի կանոնադրությունը։
Ավելի վաղ Բելառուսի նախագահ Ալեքսանդր Լուկաշենկոն, ուղերձով դիմելով ժողովրդին և խորհրդարանին, առաջարկել է դադարեցնել ռազմական գործողությունները Ուկրաինայում և զինադադար հայտարարել, գրում է РИА Новости-ն։
«Մենք պետք է կանգ առնենք հիմա՝ նախքան էսկալացիայի սկսվելը։ Ես կփորձեմ ռիսկի դիմել՝ առաջարկելով դադարեցնել ռազմական գործողությունները... հայտարարել զինադադար՝ առանց տեղաշարժի, երկու կողմից զորքերի վերախմբավորման, զենքի, զինամթերքի և ռազմական տեխնիկայի փոխանցման իրավունքի»,- ասել է պետության ղեկավարը։
Նրա խոսքով՝ եթե Արևմուտքը փորձի զինադադարն օգտագործել իր նպատակների համար, Ռուսաստանը պարտավոր է օգտագործել ռազմարդյունաբերական համալիրի և բանակի ամբողջ հզորությունը՝ կանխելու հակամարտության սրումը։
