Ուկրաինայի ԱԳՆ-ն՝ Պուտինի հայտարարության մասին

Ուկրաինան կոչ է անում G7 երկրներին և ԵՄ-ին զգուշացնել Մինսկին Բելառուսի համար հեռահար հետևանքների մասին, եթե վերջինս համաձայնի Ռուսաստանից մարտավարական միջուկային զենք ընդունել:

Ուկրաինան պահանջում է անհապաղ հրավիրել ՄԱԿ-ի Անվտանգության խորհրդի արտահերթ նիստ՝ կապված Բելառուսում մարտավարական միջուկային զենքի տեղակայման մասին Ռուսաստանի հայտարարությունների հետ։ Այս մասին ասվում է Ուկրաինայի արտաքին գործերի նախարարության հայտարարության մեջ։ Տեղեկատվությունը փոխանցում է unian.net-ը:

Ուկրաիանայի ԱԳՆ-ն նշում է, որ Ռուսաստանի Դաշնության վերջին հայտարարությունները Բելառուսի տարածքում մարտավարական միջուկային զենք տեղակայելու մտադրության մասին խաթարում են Միջուկային զենքի չտարածման մասին պայմանագրի հիմքերը, միջուկային զինաթափման ճարտարապետությունը և միջազգային համակարգը։ Նշվում է, որ Բելառուսի տարածքում միջուկային զենք տեղակայելու մտադրությունը, հակառակ Միջուկային զենքի չտարածման մասին պայմանագրով ստանձնած պարտավորություններին, այս երկիրը հետագայում կդարձնի Կրեմլի պատանդը և աղետալի հետևանքներ կունենա նրա ապագայի համար։

Հիշեցնենք՝ Պուտինն ավելի վաղ հայտարարել է, որ Ռուսաստանը մտադիր է Բելառուսում տեղակայել իր մարտավարական միջուկային զենքը: