ԱՄՆ-ում մեկ շաբաթում փակվել է արդեն երկրորդ բանկը

ԱՄՆ-ում սնանկացման մասին է հայտարարել Signature Bank-ը։ Այս մասին գրում է РБК-ն։ Նշվում է, որ սա հաջորդել է այս շաբաթ ավելի վաղ Silicon Valley Bank-ի (SVB) սնանկացմանը։

«Նյու Յորք նահանգի կարգավորող մարմինը այս որոշումը կայացրել է համակարգային ռիսկերի պատճառով»,- նշում է ԱՄՆ ֆինանսների նախարարության, Դաշնային պահուստի և Ավանդների ապահովագրման դաշնային կորպորացիայի համատեղ հայտարարության մեջ։
 

Բոլոր բանկային ավանդատուները, ինչպես SVB-ի դեպքում, լիարժեք հասանելիություն կունենան իրենց ավանդներին, և հարկ վճարողը որևէ վնաս չի կրի։ Հաղորդվում է, որ բարձրագույն ղեկավարությունը հեռացվել է պաշտոնից։
 

Գերատեսչություններն ընդգծում են, որ ԱՄՆ բանկային համակարգը մնում է կայուն՝ մեծապես 2008 թվականի ֆինանսական ճգնաժամից հետո իրականացված բարեփոխումների շնորհիվ։ 

«Այս բարեփոխումները՝ զուգորդված այսօրվա գործողությունների հետ, ցույց են տալիս մեր հանձնառությունը՝ ձեռնարկելու անհրաժեշտ քայլեր՝ ավանդատուների խնայողությունների անվտանգությունն ապահովելու համար»,- նշվում է հայտարարության մեջ։

Կոմերցիոն Signature Bank-ը 2022 թվականի դեկտեմբերի 31-ի դրությամբ ուներ մոտավորապես 110,36 միլիարդ դոլար ընդհանուր ակտիվներ և մոտավորապես 88,59 միլիարդ դոլար ընդհանուր ավանդներ, ըստ Նյու Յորքի Ֆինանսական ծառայությունների դեպարտամենտի: